Priyanka Shinde
बॉलिवूडमधील प्रसिद्ध अभिनेत्री प्रिती झिंटा ही केवळ तिच्या अभिनयासाठीच नव्हे, तर तिच्या स्पष्टवक्तेपणासाठी आणि देशावरील प्रेमासाठी देखील ओळखली जाते. गेल्या काही वर्षांपासून ती मोठ्या पडद्यापासून दूर आहे, मात्र तिची लोकप्रियता आणि सोशल मीडियावरील उपस्थिती मात्र तितकीच जोमात आहे. नुकत्याच घेतलेल्या #PZchat या ट्विटरवरील लाईव्ह सेशनमध्ये प्रितीने चाहत्यांच्या अनेक प्रश्नांना मनमोकळेपणाने उत्तर दिली, आणि त्यातील सर्वात चर्चेचा विषय ठरला तिचा राजकारणातील संभाव्य प्रवेश.
भाजपमध्ये प्रवेश करणार?
या सेशनदरम्यान एका चाहत्याने तिला थेट विचारलं,
“तुझ्या काही महिन्यांपूर्वीच्या ट्विट्सवरून असं वाटतं की तू भाजपमध्ये प्रवेश करणार आहेस का?”
यावर प्रितीने थोड्या मिश्कील पण स्पष्ट शब्दांत उत्तर दिलं.
“सोशल मीडियावर लोकांची हीच एक मोठी समस्या आहे — सगळे फारच जजमेंटल झालेत.”
तिने पुढे स्पष्ट केलं,
“मी मंदिरात जाते, महाकुंभात सहभागी होते, माझ्या भारतीय ओळखीचा अभिमान बाळगते. पण याचा अर्थ असा नाही की मी भाजपमध्ये प्रवेश करत आहे किंवा राजकारणात उतरणार आहे.”
भारतातील प्रेम आणि ओळखीचा अभिमान
राजकारणावर बोलताना प्रितीने तिच्या मातृभूमीबद्दलच्या भावना देखील शेअर केल्या.
“मी भारताबाहेर राहत असल्यामुळे मला माझ्या देशाचं खरं महत्त्व समजलं आहे. जिथे भारतीय संस्कृती, मूल्यं आणि आपुलकीला तोड नाही. आता मला भारत आणि इथल्या गोष्टींचं अधिक कौतुक वाटतं,” असे ती म्हणाली.
क्रिकेटवरील प्रेम आजही कायम
या संवादादरम्यान प्रितीच्या क्रिकेट प्रेमाचीही झलक पाहायला मिळाली. प्रिती झिंटा ही IPL मधील ‘पंजाब किंग्स’ संघाची सहमालक आहे. एका चाहत्याने विचारलं,
“पंजाब किंग्सशिवाय तुला आणखी कोणता संघ आवडतो?”
यावर प्रिती हसून म्हणाली,
“हा प्रश्न म्हणजे एखाद्या स्त्रीला विचारणं की तुला तुझा नवरा आवडतो की दुसऱ्याचा! अर्थातच, मला माझाच नवरा – म्हणजे पंजाब किंग्स – आवडतो!”
View this post on Instagram
सोशल मीडियावर कायम सक्रिय
प्रिती झिंटा सध्या सिनेमांमध्ये फारशी सक्रिय नसली तरी सोशल मीडियावर ती कायम सक्रीय असते. तिच्या वैयक्तिक आयुष्यातील गोष्टी, आठवणी, देशावरील प्रेम, क्रिकेटप्रेम आणि समाजघटकांबद्दलचे विचार ती नियमितपणे चाहत्यांसोबत शेअर करत असते. तिच्या ट्विटर, इंस्टाग्राम आणि फेसबुक पेजवर तिचे लाखो फॉलोअर्स आहेत.
राजकारणाच्या चर्चेला पूर्णविराम?
तिच्या या वक्तव्यानंतर सध्या तिच्या भाजप प्रवेशाबाबतच्या चर्चांना काहीसा ब्रेक मिळालाय. मात्र सोशल मीडियावर तिच्या प्रत्येक कृतीकडे बारीक लक्ष असलेले चाहते आणि नेटकरी पुन्हा नव्या चर्चा रंगवतील, यात शंका नाही.
