मुंबईसह संपूर्ण महाराष्ट्रात अवकाळी पावसाने हजेरी लावली असून, गेल्या दोन दिवसांपासून पावसाचा जोर कायम आहे. विशेषतः मंगळवारी संध्याकाळपासून सुरू झालेल्या मुसळधार पावसामुळे मुंबई, ठाणे आणि उपनगरांत जनजीवन विस्कळीत झालं आहे. पावसाबरोबरच सोसाट्याच्या वाऱ्यांमुळे वाहतूक व्यवस्थेवरही मोठा परिणाम झाला असून, मुंबईची लोकल सेवा यामुळे अडथळ्यांत सापडली आहे.

चाकरमान्यांसाठी सकाळचा प्रवास झाला कठीण

बुधवारी सकाळपासून पावसाचा जोर कायम असल्याने चाकरमान्यांना कार्यालयात पोहोचण्यात मोठ्या अडचणींचा सामना करावा लागला. अनेकांनी छत्र्या न घेताच बाहेर पडल्याने पावसात भिजावे लागले. लोकल ट्रेन सेवेचा विस्कळीत वेळापत्रक आणि गर्दीमुळे प्रवास अधिकच कष्टप्रद ठरला. काही ठिकाणी ट्रेन वेळेत आली असली तरी काही गाड्या १० ते १५ मिनिटांच्या उशिराने धावत होत्या, ज्यामुळे स्टेशनांवर प्रवाशांची गर्दी वाढली.

लोकल ट्रेन सेवेवर पावसाचा फटका

मुंबईची लाईफलाईन मानली जाणारी लोकल ट्रेन सेवा पावसामुळे काही काळ विस्कळीत झाली होती. पश्चिम रेल्वे मार्गावर वाऱ्यामुळे झाडाच्या फांद्या आणि कापडाचे तुकडे ओव्हरहेड वायरवर पडल्याने काही ट्रेनची वाहतूक थांबवावी लागली. रेल्वे प्रशासनाने तत्काळ कारवाई करून अडथळे दूर केले आणि सेवा सुरळीत केली, मात्र त्या दरम्यान प्रवाशांना मोठ्या गैरसोयीला सामोरे जावे लागले.

विरार-वसईमध्ये वाऱ्यामुळे झाडे कोसळली, वीज खंडित

मंगळवारी रात्री विरार आणि वसई परिसरात सोसाट्याच्या वाऱ्यांसह पावसाने थैमान घातले. अनेक ठिकाणी झाडे उन्मळून पडली, रस्ते अडले आणि विजेच्या तारा तुटल्यामुळे वीजपुरवठा खंडित झाला. काही भागांत दीर्घकाळ वीज नसल्यानं नागरिकांना अंधारात रात्र काढावी लागली. बागांचे आणि सार्वजनिक मालमत्तेचेही नुकसान झाल्याचे वृत्त आहे.

हवामान खात्याचा इशारा, पुढील दोन दिवस सतर्क राहण्याचे आवाहन

हवामान विभागाने पुढील २४ ते ४८ तासांत मुंबईसह कोकणात पावसाचा जोर राहण्याचा अंदाज वर्तवला आहे. ढगाळ वातावरण, विजांचा कडकडाट आणि वाऱ्याचा वेग वाढण्याची शक्यता असल्याने नागरिकांनी सतर्क राहण्याचं आवाहन करण्यात आलं आहे. विशेषतः समुद्रकिनाऱ्यालगत राहणाऱ्यांनी आणि दुचाकीस्वारांनी खबरदारी घ्यावी, असा सल्लाही देण्यात आला आहे.