शिरूर तालुक्यातील न्हावरा – तळेगाव रस्त्यावर रविवारी (२३ मार्च) रात्री झालेल्या भीषण अपघातात वडील आणि मुलीसह तिघांचा मृत्यू झाला, तर एक महिला गंभीर जखमी झाली आहे. मोटार आणि कंटेनरच्या धडकेत ही दुर्घटना घडली.

या अपघातात कैलास कृष्णाजी गायकवाड (४९), त्यांची मुलगी गौरी कैलास गायकवाड (२०, दोघेही रा. निंबाळकर वस्ती, न्हावरा, ता. शिरूर, जि. पुणे) आणि गणेश महादेव नेर्लेकर (२५, रा. कोकणगाव, ता. श्रीगोंदा, जि. अहिल्यानगर) यांचा मृत्यू झाला. तसेच दुर्गा कैलास गायकवाड (४८) या गंभीर जखमी झाल्या आहेत.

अपघाताचा घटनाक्रम असा आहे की, रविवारी रात्री कैलास गायकवाड आपल्या पत्नी, मुलगी आणि मेव्हण्यासोबत वाघोलीहून न्हावरेकडे जात होते. तळेगाव ते न्हावरे मार्गावर संदीप सरके यांच्या घराजवळ त्यांच्या मोटारीला समोरून येणाऱ्या कंटेनरने जोरदार धडक दिली. या भीषण अपघातात कैलास गायकवाड, गौरी गायकवाड आणि गणेश नेर्लेकर यांचा जागीच मृत्यू झाला, तर दुर्गा गायकवाड गंभीर जखमी झाल्या.

अपघातानंतर कंटेनर चालक फरार झाला आहे. या प्रकरणी रवींद्र महादेव सोनवणे (३८, रा. कुटेवस्ती, न्हावरे) यांनी पोलिस ठाण्यात तक्रार दाखल केली आहे. पोलीस निरीक्षक संदेश केंजळे यांच्या मार्गदर्शनाखाली पोलीस हवालदार भोते या प्रकरणाचा तपास करत आहेत.