दिल्लीतील केंद्रीय विद्यालयातील ३१ वर्षीय महिला शिक्षिकेने आत्महत्या केल्याची धक्कादायक घटना घडली आहे. गाजियाबादच्या वसुंधरा परिसरात आपल्या राहत्या घरात या शिक्षिकेने आपले जीवन संपवले. घटनेनंतर पोलिसांनी महिलेच्या पती आणि सासऱ्याला अटक केली आहे. कुटुंबीयांनी हुंड्याच्या मागणीचा आरोप करत तक्रार दिल्यानंतर ही कारवाई करण्यात आली.

भावाला भावनिक संदेश, सुसाईड नोटमध्ये पतीवर आरोप

मृत्यूपूर्वी शिक्षिका अन्विता शर्मा यांनी आपल्या भावाला एक भावनिक संदेश पाठवला होता. त्यामध्ये तिने लिहिले, “आय लव्ह यू भाई. प्लीज मला माफ कर आणि सर्वांची काळजी घे.” तिच्या कुटुंबीयांच्या मते, लग्नानंतर महिनाभरातच तिला त्रासाला सामोरे जावे लागले. सततच्या वादामुळे तिने घटस्फोटाचा विचार केला, परंतु पती गौरव कौशिक याने तिला पुन्हा घरी परतण्यास भाग पाडले.

सुसाईड नोटमधील धक्कादायक खुलासे

पोलिसांनी घटनास्थळी दीड पानी सुसाईड नोट जप्त केली असून त्यात अन्विता यांनी आपल्या पतीच्या वागण्याबद्दल तक्रार केली आहे. तिने लिहिले आहे, “माफ करा, मी आता हे सहन करू शकत नाही. माझ्या पतीला सुंदर, घरकाम करणारी आणि पैसे कमावणारी पत्नी हवी होती. मी सर्व प्रयत्न केले, पण त्याला नेहमीच माझ्यात चुका दिसत होत्या.”

तिने पुढे लिहिले, “तो प्रत्येक वादात मला आणि माझ्या कुटुंबाला टोमणे मारायचा. त्याने माझ्या नोकरीशी लग्न केलं, माझ्याशी नाही.” तिने हेही नमूद केले की पतीने तिच्या सर्व बँक खात्यांवर नियंत्रण मिळवले होते आणि तिला पुढील शिक्षण घेण्यास मज्जाव केला होता.

कुटुंबाचा आरोप आणि पोलिस कारवाई

अन्विता यांच्या वडिलांनी सांगितले की, लग्नासाठी त्यांनी २६ लाख रुपये खर्च केले होते. तसेच, पहिल्याच भेटीत पतीच्या कुटुंबाने वाहनाची मागणी केली होती. त्यांनी ती मागणी पूर्ण केली, परंतु वाहन पतीच्या नावावर होते.

पोलिसांनी पती गौरव कौशिक, त्याचे वडील सुरेंद्र शर्मा आणि आई मंजू यांच्या विरोधात IPC कलम ८५, ८० (२), ११५ (२), ३५२ आणि हुंडाविरोधी कायदा, १९६१ अंतर्गत गुन्हा दाखल केला आहे.

या प्रकरणाचा पुढील तपास सुरू असून पोलिस अधिक माहिती घेत आहेत.