काँग्रेसचे माजी आमदार रवींद्र धंगेकर यांनी अखेर काँग्रेसला रामराम केला आहे. गेल्या काही दिवसांपासून त्यांच्या पक्षत्यागाच्या चर्चा सुरू होत्या, त्या आता खऱ्या ठरल्या आहेत. पुण्यात पत्रकार परिषद घेऊन त्यांनी काँग्रेसच्या सदस्यत्वाचा राजीनामा जाहीर केला.

पक्ष सोडण्याचा निर्णय कठीण, पण आवश्यक

धंगेकर म्हणाले, “गेल्या १०-१२ वर्षांत काँग्रेससोबत माझं कुटुंबासारखं नातं तयार झालं. पक्षातील सहकाऱ्यांनी मला मोठं प्रेम दिलं, माझ्या पाठीशी ताकद उभी केली. लोकसभा व विधानसभा निवडणुकीत त्यांच्याच पाठिंब्यावर लढलो, जरी निकाल प्रतिकूल लागला तरीही कार्यकर्त्यांनी माझ्यासाठी खूप मेहनत घेतली. त्यामुळे पक्ष सोडण्याचा निर्णय घेणं माझ्यासाठी अत्यंत कठीण होतं.”

सत्ता नसल्यास जनतेची कामं अपूर्ण

आपल्या निर्णयामागील कारण स्पष्ट करताना ते म्हणाले, “लोकशाहीत सत्ता नसल्यास सर्वसामान्य जनतेची कामं करणं कठीण होतं. मतदारसंघातील लोकांच्या अडचणी सोडवण्यासाठी प्रभावी भूमिका बजावण्यासाठी मी नवीन मार्ग स्वीकारण्याचा निर्णय घेतला.”

शिवसेना (शिंदे गट) मध्ये प्रवेश निश्चित

धंगेकर पुढे म्हणाले, “मुख्यमंत्री एकनाथ शिंदे आणि मंत्री उदय सामंत यांच्याशी चर्चा केल्यानंतर मी त्यांच्या नेतृत्वाखाली काम करण्याचा निर्णय घेतला. मुख्यमंत्री असताना एकनाथ शिंदे यांनी माझ्या मतदारसंघातील विकासकामांना मदत केली होती. त्यांचा जनसामान्यांमध्ये मोठा विश्वास आहे. त्यामुळे मी संध्याकाळी त्यांना भेटून पुढील निर्णय जाहीर करेन.”

यामुळे पुण्यातील राजकीय समीकरणे बदलण्याची शक्यता असून, धंगेकर यांच्या शिवसेना (शिंदे गट) प्रवेशाकडे सर्वांचे लक्ष लागले आहे.