महाराष्ट्रात महायुतीने एकूण २३९ जागांवर विजय मिळवला असून, त्यातील १३२ जागांवर भारतीय जनता पक्षाने (भाजपा) विजय संपादित केला आहे. त्यामुळे भाजपा १३२ आमदारांसह राज्यातील सर्वात मोठा पक्ष ठरला आहे. एकनाथ शिंदे यांच्या नेतृत्वाखालील शिवसेनेने ५७ जागांवर विजय मिळवला असून, त्यांना ४ पुरस्कृत आमदारांचीही साथ मिळाली आहे. यामुळे एकनाथ शिंदे यांच्याकडे एकूण ६१ आमदारांचे बळ आहे.

दुसरीकडे, अजित पवार यांच्या गटाने ४१ जागांवर विजय मिळवला आहे. महायुतीत इतके ठळक विजय मिळवूनही मुख्यमंत्रीपदासाठी सस्पेन्स कायम आहे.

मुख्यमंत्री कोण होणार? शिंदेंची नाराजी वाढली?

मुख्यमंत्री पदासाठी दिल्लीत झालेल्या बैठकीत एकनाथ शिंदे यांचा “गंभीर मूड” चर्चेचा विषय ठरला आहे. केंद्रीय गृहमंत्री अमित शाह यांच्या भेटीदरम्यान शिंदे नाराज असल्याचे काही फोटो समोर आले आहेत. या चर्चांमुळे मुख्यमंत्री पदासाठी शिंदेंची शक्यता मावळली का, असा प्रश्न उपस्थित होतो आहे.

रात्री उशिरा दिल्लीत उच्चस्तरीय बैठक पार पडली असून, त्यात मुख्यमंत्री पदाचा निर्णय होण्याची शक्यता आहे. मात्र, भाजपाने आपल्याकडे सर्वाधिक जागा असल्याने मुख्यमंत्रीपदावर हक्क सांगितल्याचे समजते.

राजकीय समीकरणे काय?

• भाजपा: १३२ आमदार
• शिवसेना (शिंदे गट): ५७ आमदार + ४ पुरस्कृत (एकूण ६१)
• अजित पवार गट: ४१ आमदार

राजकीय समीकरणे पाहता मुख्यमंत्री पदावरून भाजप आणि शिंदे गटात रस्सीखेच सुरू असल्याचे दिसत आहे. पुढील काही दिवसांत या निर्णयावर सर्वांचे लक्ष लागले आहे.

आता महत्त्वाचा प्रश्न: महाराष्ट्राच्या मुख्यमंत्रिपदी कोण विराजमान होणार?