पुण्यातील स्वारगेट परिसरातील घटनेनंतर आता छत्रपती संभाजीनगरमध्येही धक्कादायक प्रकार समोर आला आहे. ३६ वर्षीय विवाहितेवर बलात्काराचा प्रयत्न करून विरोध केल्याने नराधमाने तिला निर्घृण मारहाण केली. तिचा चेहरा विद्रूप करत शरीरावर १५ पेक्षा जास्त चाकूचे वार केले.

अभिषेक तात्याराव नवपुते (वय १९, रा. घारदोन) या आरोपीने अनेक दिवस विवाहितेचा पाठलाग केला होता. २ मार्च रोजी संध्याकाळी, जेव्हा ती शेतात काम करत होती, त्यावेळी त्याने तिचा गळा दाबून बलात्काराचा प्रयत्न केला. महिलेने प्रतिकार करताच, संतापलेल्या आरोपीने तिला जमिनीवर आपटले आणि चेहरा, पोट, डोके, मान, हातावर अमानुष वार केले. इतकेच नाही, तर ती बेशुद्ध पडल्याचे समजून तिच्या डोक्यात दगड घालून पसार झाला.

दरम्यान, शेताच्या दुसऱ्या टोकाला असलेल्या सासूला सून रक्तबंबाळ अवस्थेत आढळली. कुटुंबाने तिला तातडीने शहरातील रुग्णालयात नेले. एका रुग्णालयाने दाखल करण्यास नकार दिल्याने तिला दुसऱ्या खासगी रुग्णालयात दाखल करण्यात आले. सोमवारी रात्री शुद्धीवर आल्यावर तिने पोलिसांना संपूर्ण प्रकार सांगितला. तिच्या शरीरावर तब्बल ५२ टाके पडले असल्याचे पोलिसांनी सांगितले.

गुन्हा दाखल झाल्याचे कळताच आरोपी शेतात लपून बसला होता. पोलिस अधीक्षक डॉ. विनयकुमार राठोड आणि उपअधीक्षक पूजा नांगरे यांच्या मार्गदर्शनाखाली निरीक्षक रविकिरण दरवडे आणि उपनिरीक्षक सतीश पंडित यांच्या पथकाने त्याला अटक केली.

महिलांवरील वाढत्या अत्याचारांच्या घटना धक्कादायक असून, अशा गुन्हेगारांना कठोर शिक्षा व्हावी, अशी मागणी नागरिकांकडून केली जात आहे.