मुंबई (प्रतिनिधी): हिंगोली जिल्ह्यातील कळमनुरी विधानसभेचे नवनिर्वाचित आमदार संतोष बांगर यांनी आज मुंबईत दादर येथील चैत्यभूमीला भेट देऊन बौद्ध पद्धतीने परमपूज्य डॉ. बाबासाहेब आंबेडकर यांच्या स्मृतीस्थळाचे दर्शन घेतले आणि अभिवादन केले. 

नुकत्याच झालेल्या महाराष्ट्र विधानसभेच्या निवडणुकीत संतोष बांगर यांनी कळमनुरी विधानसभा मतदारसंघातून तब्बल 31,000 मताधिक्याने विजय मिळवला. आमदार म्हणून विजयानंतर प्रथमच मुंबईला आल्यावर त्यांनी चैत्यभूमीवर जाऊन महाकारूणीक तथागत भगवान बुद्ध आणि बोधिसत्व डॉ. बाबासाहेब आंबेडकर यांच्या पुतळ्यांना वंदन केले. 

आमदार बांगर हे आंबेडकरी चळवळीतील सक्रिय कार्यकर्ते असून, कळमनुरी विधानसभा मतदारसंघात त्यांनी पूज्य भदंत चंद्रमणी महास्थविर यांच्या नावाने भव्य बुद्ध विहार व विपस्सना ध्यान केंद्राची स्थापना केली आहे. या केंद्रासाठी त्यांनी स्वतःची चार एकर जमीन दान केली असून, या उपक्रमामुळे बौद्ध समुदायामध्ये त्यांच्याबद्दल विशेष आदर निर्माण झाला आहे. 

भदंत चंद्रमणी महास्थविर ध्यानसाधना केंद्राला भविष्यात तीर्थक्षेत्र म्हणून विकसित करण्याचा निर्धार आमदार बांगर यांनी व्यक्त केला. त्यांचा हा उपक्रम बौद्ध धम्म प्रसारासाठी महत्त्वाचा टप्पा ठरेल, असा विश्वास बौद्ध समाज व्यक्त करत आहे.