पश्चिम बंगालच्या मुर्शिदाबाद जिल्ह्यात शुक्रवारी वक्फ कायद्याविरोधात सुरू झालेलं आंदोलन काही तासांतच हिंसक बनलं. सुती आणि शमशेरगंज या ठिकाणी शेकडो आंदोलकांनी रस्त्यावर उतरून घोषणाबाजी केली, मात्र आंदोलनाचं रूप चिघळत गेलं आणि त्यानंतर मोठ्या प्रमाणात दगडफेक, जाळपोळ आणि पोलीस दलावर हल्ला झाला. या घटनेमुळे परिसरात तणाव निर्माण झाला असून पोलिसांनी तात्काळ कारवाई करत परिस्थितीवर नियंत्रण मिळवलं आहे.

नमाजेनंतर जमाव जमला, आंदोलनाला हिंसक वळण

शुक्रवारी जुम्याच्या नमाजेनंतर सुती गावात मोठ्या संख्येने मुस्लिम नागरिकांनी वक्फ कायद्याविरोधात निषेध आंदोलनासाठी एकत्र येण्यास सुरुवात केली. सुरुवातीला शांततेत सुरू झालेलं हे आंदोलन अचानक आक्रमक बनलं. आंदोलकांनी पोलिसांवर दगडफेक केली, सार्वजनिक व खाजगी वाहनांवर हल्ले केले आणि काही वाहने पेटवून दिली.

शमशेरगंज परिसरात डाकबंगला ते सजुर मोड दरम्यान आंदोलकांनी राष्ट्रीय महामार्ग-12 अडवला. यामुळे महामार्गावरील वाहतूक पूर्णतः ठप्प झाली होती. आंदोलन अधिकच तीव्र होत गेलं आणि पोलिसांवर हल्ला करून काही जणांनी त्यांना पळवून लावण्याचा प्रयत्न केला. परिस्थिती नियंत्रणाबाहेर जात असल्याचे लक्षात आल्यानंतर काही पोलिसांनी जवळच्या मशिदीत आश्रय घेतल्याची माहिती एका वरिष्ठ पोलिस अधिकाऱ्याने दिली.

पोलीस व्हॅन पेटवली, १० पोलिस कर्मचारी जखमी

हिंसाचाराच्या वेळी आंदोलकांनी पोलिसांच्या गाड्यांवर दगडफेक केली आणि एक पोलीस व्हॅन पेटवून दिली. पोलिस आणि आंदोलकांमध्ये चकमक झाली, ज्यात १० पोलिस कर्मचारी जखमी झाले. काहींना गंभीर दुखापत झाली असून त्यांच्यावर स्थानिक रुग्णालयात उपचार सुरू आहेत.

The situation in the Suti and Samserganj areas of Jangipur is now under control. The unruly mob has been dispersed by effective police action. Traffic has returned to normalcy on the national highway. Strict action will be taken against those who have resorted to violence. Raids… pic.twitter.com/dLFahE5QlI

— ANI (@ANI) April 11, 2025

पोलिसांची तात्काळ कारवाई, अश्रुधुर व लाठीचार्जचा वापर

जमाव अनियंत्रित होत असल्याचं लक्षात घेऊन पोलिसांनी लाठीचार्ज व अश्रुधुराच्या नळकांड्यांचा वापर करत आंदोलकांना पांगवलं. स्थानिक प्रशासनाने BSF (सीमा सुरक्षा बल) कडून मदतीची विनंती केली असून काही ठिकाणी तात्पुरती बंदोबस्त वाढवण्यात आली आहे. बंगाल पोलिसांनी X (माजी ट्विटर) या प्लॅटफॉर्मवरुन माहिती देत सांगितलं की, सुती व शमशेरगंज परिसरात परिस्थिती नियंत्रणात असून राष्ट्रीय महामार्गावरील वाहतूक पूर्वपदावर आली आहे.

राजकीय व सामाजिक प्रतिक्रिया

या घटनेवरून राज्यात नव्या राजकीय घडामोडींनाही सुरूवात झाली आहे. भाजप प्रदेशाध्यक्ष सुकांत मजूमदार यांनी मुख्यमंत्री ममता बॅनर्जी यांच्यावर टीका करत राज्यातील कायदा आणि सुव्यवस्था ढासळल्याचा आरोप केला आहे. त्यांनी आरोप केला की, “राज्यात अशा प्रकारे पोलिसांवरच हल्ले होणे ही अत्यंत गंभीर बाब आहे. हे राज्य सरकारचं अपयश दर्शवतं.”

अफवा न पसरवण्याचं आवाहन, कडक कारवाईचं आश्वासन

बंगाल पोलिसांनी अफवांपासून दूर राहण्याचं आवाहन केलं आहे आणि सांगितलं आहे की, हिंसाचार घडवणाऱ्यांवर तसेच सोशल मीडियावर खोटी माहिती पसरवणाऱ्यांवर कडक कारवाई करण्यात येईल. अनेक ठिकाणी संशयितांची धरपकड सुरू असून परिसरात सतत गस्त वाढवण्यात आली आहे.

इतर जिल्ह्यांमध्येही आंदोलनाची झळ

मुर्शिदाबादपुरती ही घटना मर्यादित राहिली नाही. मालदा जिल्ह्यातही आंदोलकांनी रेल्वे रुळांवर धरणं आंदोलन केलं, ज्यामुळे काही वेळ रेल्वे वाहतूक विस्कळीत झाली होती. सुदैवाने कोणतीही मोठी दुर्घटना घडली नाही.

संपर्कात राहा – शांतता राखा, असं आवाहन पोलिसांनी नागरिकांना केलं असून, सध्या संपूर्ण जिल्ह्यात पोलीस बंदोबस्त कडक करण्यात आलेला आहे.