नांदेड/हिंगोली – शेतीकामासाठी मजुरांना घेऊन जाणारा ट्रॅक्टर ट्रॉलीसह कठडे नसलेल्या विहिरीत कोसळून झालेल्या भीषण अपघातात सात महिलांचा मृत्यू झाला. ही दुर्दैवी घटना शुक्रवार, ४ एप्रिल रोजी सकाळच्या सुमारास आलेगाव (ता. नांदेड) शिवारात घडली. या अपघातात दोन महिला आणि एका पुरुषाला सुखरूप वाचवण्यात यश आले.

मृत आणि जखमी मजूर हे हिंगोली जिल्ह्यातील वसमत तालुक्यातील गुंज गावचे रहिवासी आहेत. अपघातानंतर तब्बल सहा तासांच्या प्रयत्नानंतर सातही मृतदेह विहिरीतून बाहेर काढण्यात आले.

मृत महिलांची नावे :
ताराबाई जाधव (३५), ध्रुपता जाधव (१८), सरस्वती भुरड (२५), सिमरन कांबळे (१८), चउत्राबाई पारधे (४५), ज्योती सरोदे (३०), सपना ऊर्फ मीना राऊत (२५).
बचावलेले मजूर: पार्वतीबाई बुरुड (३५), पुरभाबाई कांबळे (४०), सटवाजी जाधव (५५).

घटनेची माहिती मिळताच पोलीस, आपत्ती व्यवस्थापन पथक, अग्निशमन दल, आणि वरिष्ठ अधिकारी घटनास्थळी दाखल झाले. सुरुवातीला विहिरीतील पाणी उपसण्यात आले आणि नंतर क्रेनच्या सहाय्याने ट्रॅक्टर बाहेर काढण्यात आला. सर्व मृतदेह ट्रॉलीखाली अडकलेले होते.

अपघातानंतर मृतांचे शवविच्छेदन वसमत उपजिल्हा रुग्णालय, नांदेड जिल्ह्यातील निळा आणि लिंबगाव प्राथमिक आरोग्य केंद्रात करण्यात आले. जिल्हा प्रशासन, पोलीस आणि पंचायत विभागाने तत्काळ मदतकार्य हाती घेतले.

शोक व मदतीची घोषणा

पंतप्रधान नरेंद्र मोदी यांनी या दुर्घटनेबद्दल शोक व्यक्त केला असून मृतांच्या कुटुंबीयांना पंतप्रधान राष्ट्रीय मदत निधीतून प्रत्येकी २ लाख, तर जखमींना ५० हजार रुपये मदत जाहीर केली. याशिवाय, मुख्यमंत्री सहायता निधीतून मृतांच्या कुटुंबीयांना प्रत्येकी ५ लाख रुपये देण्यात येणार असल्याची घोषणा करण्यात आली आहे.

कठडे नसलेल्या विहिरींवर प्रशासकीय कारवाई

या अपघातामुळे नांदेड जिल्ह्यातील कठडे नसलेल्या विहिरींचा प्रश्न ऐरणीवर आला आहे. “या संदर्भात तातडीने उपाययोजना करण्याचे निर्देश देण्यात आले आहेत,” असे निवासी उपजिल्हाधिकारी महेश वडदकर यांनी सांगितले.