सकल मराठा समाजाचे तहसीलदार मार्फत मुख्यमंत्र्यांना निवेदन

जिंतूर प्रतिनिधी:
बीड जिल्ह्यातील केज तालुक्यातील मस्साजोग गावचे तरुण सरपंच व मराठा आरक्षण चळवळीतील सक्रिय कार्यकर्ते संतोष अण्णा देशमुख यांचे अपहरण करून खून करण्यात आला. या प्रकरणातील सर्व आरोपींना अटक करून फास्टट्रॅक कोर्टात खटला चालवून तत्काळ फाशी देण्याची मागणी सकल मराठा समाजाने जिंतूर तालुक्याच्या वतीने केली आहे. गुरुवार, 12 डिसेंबर रोजी तहसीलदारांच्या मार्फत हे निवेदन मुख्यमंत्र्यांना देण्यात आले.

सकल मराठा समाजाच्या निवेदनात नमूद करण्यात आले आहे की, मागील काही दिवसांपासून मराठा समाजातील प्रतिष्ठित व्यक्तींना लक्ष्य करून धमक्या देणे, मारहाण करणे असे प्रकार वाढले आहेत. याच पार्श्वभूमीवर मस्साजोग गावचे सरपंच संतोष अण्णा देशमुख यांचे अपहरण करून अमानुषपणे मारहाण करत त्यांचा खून करण्यात आला. या घटनेचा मराठा समाजाने तीव्र निषेध व्यक्त केला आहे.

मुख्य मागण्या:

1. सर्व आरोपींना अटक करणे.
2. प्रकरणाची उच्चस्तरीय चौकशी.
3. खटला फास्टट्रॅक कोर्टात चालवणे.
4. साक्षीदारांना पोलीस संरक्षण देणे.

सदर निवेदन तहसीलदारांच्या हस्ते मुख्यमंत्री कार्यालयाला पाठवण्यात आले असून, या निवेदनावर मराठा समाजातील अनेक तरुणांच्या स्वाक्षऱ्या आहेत.

संतोष देशमुख यांच्या हत्येप्रकरणी कठोर कारवाईची मागणी होत आहे. हा संघर्ष मराठा समाजाच्या एकतेचे प्रतीक ठरत आहे.