विधानसभा निवडणुकीच्या प्रचारात महायुतीतील सर्वच पक्ष ‘मुख्यमंत्री माझी लाडकी बहीण योजने’चा प्रभावीपणे प्रचार करताना दिसत आहेत. या योजनेच्या माध्यमातून महायुतीतील पक्ष, उमेदवार, आणि नेत्यांचा प्रचार मोठ्या प्रमाणात करण्यात येत आहे.

योजनेच्या लाभार्थ्यांना आकर्षित करण्याच्या हेतूने काही नेते, योजना स्थिर राहील की नाही, असा प्रश्न उपस्थित करून मतं मिळवण्याचा प्रयत्न करत आहेत. काहींनी प्रचारादरम्यान विवादास्पद वक्तव्येही केली आहेत, ज्यामुळे वातावरण अधिकच तापलं आहे.

धनंजय महाडिक यांचे वादग्रस्त विधान

भाजपाचे खासदार धनंजय महाडिक यांनी ९ नोव्हेंबर रोजी कोल्हापुरातील प्रचारसभेत बोलताना ‘लाडकी बहीण योजना’ संदर्भात एक विवादास्पद विधान केलं. त्यांनी म्हटलं, “लाडकी बहीण योजनेचे १५०० रुपये घेणाऱ्या महिला जर काँग्रेसच्या प्रचारफेऱ्यांमध्ये दिसल्या तर त्यांचे फोटो काढा आणि आम्हाला पाठवा, आम्ही त्यांची व्यवस्था करू.” महाडिक यांच्या या वक्तव्यामुळे विविध राजकीय गटांत चर्चेला तोंड फुटलं आहे.

मेघाराणी जाधव यांचा कडक इशारा

महायुतीमधून आणखी एक वादग्रस्त विधान कोल्हापूर भाजपाच्या महिला उपाध्यक्षा आणि माजी जिल्हा परिषद सदस्या मेघाराणी जाधव यांनी केलं. त्यांनी लाडकी बहीण योजनेचे पैसे घेतलेल्या महिलांना, “धनुष्यबाणाला मत न देता इतरत्र मत दिलं तर तुमच्याकडून ३,००० रुपये वसूल करू,” असा इशारा दिला.

त्यांनी कोल्हापूरमध्ये एका प्रचारसभेत बोलताना उपस्थित महिलांना, “बायकांनो! फक्त धनुष्यबाणाला मतदान करा, नाही तर दिलेल्या १५०० रुपयांच्या बदल्यात ३,००० रुपये वसूल करू,” असा सल्ला दिला. त्यांच्या या वक्तव्यामुळे कोल्हापूरमधील राजकीय वातावरण तापलं आहे.

महायुतीच्या प्रचारात तीव्रता वाढते

महायुतीच्या नेत्यांच्या या वादग्रस्त वक्तव्यांमुळे प्रचाराची तीव्रता वाढली असून, यावर विरोधकांनीही टीका सुरू केली आहे. ‘मुख्यमंत्री माझी लाडकी बहीण योजना’च्या माध्यमातून महिलांना दिल्या जाणाऱ्या रकमेमुळे या योजनेचा राजकीय प्रचारात मोठ्या प्रमाणात वापर होताना दिसत आहे.