डॉक्टर म्हणजे जीव वाचवणारा… पण जर तोच डॉक्टर जीव घेऊ लागला, तर ?

जर्मनीमधून समोर आलेली ही घटना थरकाप उडवणारी आहे. जो डॉक्टर रुग्णांचे दुःख कमी करतो, त्यानेच आपल्या विकृत मानसिकतेसाठी 15 निरपराध रुग्णांचा जीव घेतला. या घटनेने केवळ जर्मनीच नव्हे, तर संपूर्ण जगात खळबळ उडवली आहे.

कोण आहे हा मृत्यूदूत डॉक्टर?

जोहान्स एम. नावाचा हा 40 वर्षीय डॉक्टर पॅलिएटिव्ह केअर विभागात कार्यरत होता. या विभागात अशा रुग्णांवर उपचार केले जातात ज्यांना बरे होण्याची शक्यता फारच कमी असते – आणि त्यामुळे त्यांच्या शेवटच्या दिवसात वेदना कमी करणं, हीच प्राथमिकता असते. मात्र, जोहान्सने हीच परिस्थिती आपली मौजमजेसाठी वापरली.

सप्टेंबर 2021 ते जुलै 2024 या कालावधीत त्याने 12 महिला आणि 3 पुरुष – वय वर्षं 25 ते 94 यांचा मृत्यू घडवून आणला.

हत्येची पद्धत – माणुसकीला काळीमा फासणारी

या डॉक्टरने रुग्णांना त्यांच्या संमतीशिवाय किंवा कोणत्याही वैध कारणाविना अ‍ॅनेस्थेटिक्स (बेहोशी आणणारी औषधे) आणि स्नायू शिथिल करणारी औषधे दिली. ही औषधं एकत्र केल्यावर काही मिनिटांतच रुग्ण पूर्णतः बधीर होऊन मृत्यूमुखी पडत असत.

त्याने रुग्णांना ही औषधं गुपचूप दिली – कोणतीही नोंद न ठेवता. वैद्यकीय फाइल्समध्ये काहीच उल्लेख न करता त्याने अत्यंत निर्दयपणे ही कृत्यं केली.

गुन्हे लपवण्यासाठी ‘आग’ लावण्याचे प्रयत्न

या घटनेचा सर्वात धक्कादायक भाग म्हणजे – डॉक्टरने आपले गुन्हे लपवण्यासाठी पाच वेळा रुग्णांच्या घरांना आग लावण्याचा प्रयत्न केला.

8 जुलै 2024 या दिवशी तर त्याने एकाच दिवशी दोन हत्या केल्या – सकाळी एका 75 वर्षीय रुग्णाची क्रुझबर्गमध्ये आणि दुपारी न्यूकोलोन जिल्ह्यात 76 वर्षीय महिलेची हत्या. त्यानंतर, एका रुग्णाच्या मृत्यूची ‘नाटकी’ तक्रारही त्याने आपत्कालीन सेवेला स्वतःच केली – जणू तो काहीही माहीत नसल्यासारखा.

तपास सुरू झाला तेव्हा…

ऑगस्ट 2024 मध्ये चार संशयास्पद मृत्यूंनंतर या डॉक्टरला प्रथमच अटक करण्यात आली. सुरुवातीला ही प्रकरणं सदोष मनुष्यवध म्हणून मांडली गेली. मात्र, तपास जसजसा पुढे गेला, तसतशी मुद्दाम खून असल्याचे स्पष्ट झाले.

नोव्हेंबर 2024 मध्ये सरकारी वकिलांनी अधिक चार हत्यांची भर केली आणि आता त्याच्यावर एकूण 15 हत्यांचे आरोपपत्र दाखल करण्यात आले आहे.

पुढील तपास काय सांगतोय?

विशेष तपास पथकाने 395 रुग्णांची फाइल्स तपासल्या, ज्यामध्ये 95 रुग्णांबाबत प्राथमिक संशय आहे. त्यामुळे

“या डॉक्टरचा हेतू केवळ आणि केवळ खूनच होता.” असे सरकारी वकिलांनी स्पष्टपणे सांगितले आहे.