Priyanka Shinde
ऑस्ट्रेलियातील भारतीय समुदायाचा माजी नेता आणि एकेकाळचा ओव्हरसीज फ्रेंड्स ऑफ भाजपाचा (OFBJP) सक्रिय सदस्य बालेश धनखड याला १३ बलात्कार आणि एकूण ३९ गुन्ह्यांत दोषी ठरवल्यानंतर ४० वर्षांची तुरुंगवासाची शिक्षा सुनावण्यात आली आहे. ऑस्ट्रेलियाच्या इतिहासातील सर्वांत धोकादायक बलात्कारींपैकी एक अशी अधिकाऱ्यांनी त्याची ओळख दिली आहे.
नोकरीच्या आमिषाने फसवणूक आणि अमली पदार्थांचा वापर
धनखडने नोकरीच्या बनावट मुलाखतींच्या नावाखाली तरुण महिलांना फसवून त्यांना अमली पदार्थ देऊन बलात्कार केला. महिलांच्या संमतीशिवाय हे अत्याचार रेकॉर्ड करून तो त्यांचा गैरवापर करायचा. त्याने कोरियन महिलांना खास लक्ष्य केलं, त्यांच्यावर अमानुष अत्याचार केले आणि त्यांना सौंदर्य, बुद्धीमत्ता यांच्या आधारे रँकिंग दिली जात असे.
२०१८ मध्ये पाचव्या पीडितेवर अत्याचार केल्यानंतर पोलिसांनी त्याच्या सिडनी सीबीडी अपार्टमेंटवर छापा टाकला. या वेळी मोठ्या प्रमाणावर डेट-रेप ड्रग्ज आणि गुप्त कॅमेऱ्यात रेकॉर्ड केलेले अत्याचाराचे व्हिडिओ सापडले.
न्यायालयाचा कठोर निर्णय
२०२३ मध्ये सिडनी न्यायालयाने त्याला दोषी ठरवल्यानंतर, आता जिल्हा न्यायालयाचे न्यायाधीश मायकल किंग यांनी त्याच्या गुन्ह्यांना अत्यंत घृणास्पद आणि पूर्वनियोजित ठरवत ४० वर्षांची शिक्षा सुनावली. त्याने केवळ स्वतःच्या विकृत इच्छांसाठी पीडितांचे जीवन उद्ध्वस्त केले, असे न्यायालयाने स्पष्ट केले.
भाजपाचा निषेध आणि संबंधांचा इन्कार
बालेश धनखडच्या गुन्हेगारी कारवायांविषयी २०२३ मध्ये ऑस्ट्रेलियातील ओव्हरसीज फ्रेंड्स ऑफ भाजपाने (OFBJP) सोशल मीडियावरून त्याचा निषेध केला. तसेच, त्याने २०१८ मध्येच संघटनेतील आपले पद सोडल्याचे स्पष्ट केले.
या खटल्यामुळे ऑस्ट्रेलियातील भारतीय समुदायात मोठी खळबळ उडाली असून, कठोर शिक्षेचा निर्णय हा पीडितांसाठी न्याय देणारा ठरल्याचे मानले जात आहे.
