मालाड: मढ येथे ख्रिश्चन धर्मियांसाठी अत्यंत महत्त्वाचा असलेला गुड फ्रायडे हा पवित्र दिवस शुक्रवारी साजरा करण्यात आला. येशू ख्रिस्ताच्या क्रूसावरील बलिदान आणि कॅलव्हरी येथील मृत्यूचे स्मरण करणारा हा दिवस ख्रिश्चन बांधवांसाठी शोक आणि आध्यात्मिक चिंतनाचा दिवस आहे. ईस्टरच्या आधी येणाऱ्या या पवित्र शुक्रवाराला ‘गुड फ्रायडे’, ‘ग्रेट फ्रायडे’ किंवा ‘ब्लॅक फ्रायडे’ असेही संबोधले जाते, जो मानवतेच्या मुक्तीसाठी येशूच्या दुःख आणि त्यागाचे प्रतीक आहे.

या पवित्र दिनानिमित्त, शाहू फुले आंबेडकर सामाजिक संस्थेने मढ मार्केट येथे ख्रिश्चन बांधवांसाठी पाणी वाटपाचा स्तुत्य उपक्रम आयोजित केला. गेल्या पाच वर्षांपासून सामाजिक, शैक्षणिक आणि आरोग्य क्षेत्रात कार्यरत असलेली ही संस्था नेहमीच एकतेचा संदेश देत आली आहे. या उपक्रमाचे मढ बोनाव्हेंचर चर्चचे फादर संदीप बोर्जेस यांनी कौतुक केले. ते म्हणाले, “आजच्या काळात समाजाला अशा एकतेच्या उपक्रमांची गरज आहे.”

या प्रसंगी संस्थेचे अध्यक्ष अमोल भालेराव, संस्थापक आकाश रणधीर, सचिव अविनाश ओवळे, खजिनदार नितीन मोहिते, प्रमुख सल्लागार सचिन जाधव, उपाध्यक्ष सूरज भालेराव, उपखजिनदार देवानंद शिरसाठ, उपसचिव गजानन बनसोड, महिंद्र गौतम, मयूर मोहिते यांच्यासह मोठ्या संख्येने नागरिक उपस्थित होते. हा उपक्रम समाजात एकता आणि बंधुभाव वाढवणारा ठरला.